معاشی اور سماجی انصاف کے نظام کی فوری ضرورت

اکیسویں صدی کی تیسری دہائی میں عالمی منظرنامہ ایک عجیب اور ہولناک تضاد سے گزر رہا ہے۔ ایک طرف تکنیکی ترقی، مصنوعی ذہانت کا پھیلاؤ اور خلائی تسخیر کی چکا چوند ہے تو دوسری طرف اسی چمک دمک کے نیچے سلگتا ہوا عوامی عدم اطمینان کا ایک تاریک سمندر ہے۔ موجودہ دور میں، عالمی منظرنامے پر عوامی احتجاج اور شہری حقوق کا مطالبہ ایک نئے اور سنگین موڑ پر آ کھڑا ہوا ہے۔ جین-زی کا عالمی غصہ اسی انتظامی ناکامی، اقتدار کے ادارہ جاتی غرور اور کارپوریٹ نواز معاشی پالیسیوں کے خلاف ایک احتجاجی آواز ہے۔
انسانی حقوق کا ڈھنڈورا پیٹنے والے عالمی ادارے اور جمہوری حکومتیں آج عام آدمی کی بنیادی ضروریات کو پورا کرنے میں ناکام ثابت ہو رہی ہیں جس سے عالمی سطح پر ایک وسیع غم و غصے اور بے چینی نے جنم لیا ہے۔ نوجوانوں کا یہ عدم اطمینان کوئی وقتی یا بلاوجہ کا جذبہ نہیں ہے بلکہ یہ اس نظام کے خلاف ایک فکری بغاوت ہے جس نے انہیں سنہرے خواب تو دکھائے لیکن حقیقت میں صرف غیر یقینی صورتحال اور مایوسی ہی دی۔ آج کا نوجوان تاریخ میں سب سے زیادہ تعلیم یافتہ، بیدار اور تکنیکی طور پر باصلاحیت ہے۔ لیکن جب وہ یونیورسٹی کی دہلیز پار کر کے معاشرے میں قدم رکھتا ہے تو اسے مواقع کے بجائے مختلف رکاوٹوں کا سامنا کرنا پڑتا ہے۔
’انٹرنیشنل لیبر آرگنائزیشن‘ کی رپورٹیں بتاتی ہیں کہ عالمی سطح پر نوجوانوں میں بے روزگاری کی شرح عام شرح سے تین گنا زیادہ ہے۔ دنیا بھر میں کروڑوں نوجوان ’انڈر ایمپلائڈ‘ (اپنی قابلیت سے کم درجے کا کام کرنے پر مجبور) ہیں۔ یہ صورتحال نوجوانوں میں بے چینی پیدا کر رہی ہے۔ نوجوانوں کا یہ غصہ صرف ملازمت نہ ملنے کا غصہ نہیں ہے بلکہ یہ سیاسی، سماجی اور معاشی نظام پر عدم اعتماد کا اظہار ہے۔
یورپی معاشرے کا بکھراؤ: امیر ممالک میں پنپتا نیا مفلوک الحال طبقہ
یہ بحران صرف تیسری دنیا یا ترقی پذیر ممالک تک محدود نہیں ہے۔ حقیقت یہ ہے کہ آج کل یورپی ممالک میں شدید غصہ پایا جاتا ہے۔ پیرس کی سڑکوں پر اٹھتا ہوا دھواں اور دوسرے ممالک میں ہونے والے وسیع مظاہرے اور عوامی احتجاج کی آوازیں اس بات کا زندہ ثبوت ہیں کہ سرمایہ دارانہ خوشحالی کا نقاب اب اتر چکا ہے۔ ان ترقی یافتہ یورپی معاشروں میں بھی تعلیم، روزگار، بڑھتی ہوئی مہنگائی اور مہنگے مکانات کی شکایات ہیں۔ فرانس میں 'یلو ویسٹ' تحریک سے لے کر یورپی ممالک میں بڑے پیمانے پر ہونے والے مظاہرے اسی نظام کی مایوسی کو ظاہر کرتے ہیں۔
یورپ کی شماریاتی ایجنسیاں ظاہر کرتی ہیں کہ گزشتہ کچھ عرصے میں زندگی گزارنے کی لاگت میں غیر معمولی اضافہ ہوا ہے۔ توانائی کے بحران اور افراط زر نے وہاں کے متوسط اور نچلے متوسط طبقے کو حاشیے پر دھکیل دیا ہے۔ رئیل اسٹیٹ کے مالیاتی نظام کی وجہ سے برلن، ایمسٹرڈیم اور پیرس جیسے شہروں میں ایک عام محنت کش شہری کے لیے ایک معمولی مکان کا کرایہ ادا کرنا اس کی آدھی سے زیادہ آمدنی کو نگل جاتا ہے۔ صورتحال یہ ہے کہ نوجوانوں کے پاس ڈگریاں تو ہیں لیکن سر چھپانے کے لیے چھت اور باوقار زندگی جینے کے وسائل نہیں ہیں۔ فلاحی ریاست کا تصور آخر کہاں کھو گیا ہے۔ اس پورے منظرنامے کا سب سے زیادہ تشویشناک پہلو یہ ہے کہ تعلیم، روزگار، بڑھتی ہوئی مہنگائی اور مہنگے مکانات براہِ راست شہریوں کے بنیادی حقوق سے جڑے ہوئے ہیں۔ اقوام متحدہ کے انسانی حقوق کے عالمی منشور کی دفعہ 25 واضح طور پر کہتی ہے کہ ہر شخص کو خوراک، لباس، مکان، طبی نگہداشت اور ضروری سماجی خدمات سمیت صحت اور بہبود کے لیے ضروری معیارِ زندگی کا حق ہے۔ لیکن آج کی پالیسیاں ہاؤسنگ کو ایک بنیادی حق ماننے کے بجائے منافع کمانے کی چیز سمجھتی ہیں۔
تعلیم اور صحت جیسی بنیادی ضروریات، جو کسی بھی فلاحی ریاست کی اولین ترجیح ہونی چاہیے تھیں، ان کی اندھا دھند طریقے سے نجکاری کر دی گئی ہے۔ جب ریاست اپنی ان بنیادی ذمہ داریوں سے پلہ جھاڑ لیتی ہے تو وہ بالواسطہ طور پر اپنے ہی شہریوں کے بنیادی حقوق پامال کر رہی ہوتی ہے۔ شہریوں کا یہ غصہ اسی پامالی کے خلاف ایک قدرتی ردعمل ہے۔ یہ مطالبہ ہے کہ زندگی کے حق کو صرف سانس لینے کی آزادی تک محدود نہ رکھا جائے بلکہ اس میں وقار، تحفظ اور خوشحالی کی بنیادی شرائط بھی شامل ہوں۔
جنگ کی تباہ کاری اور اقوام متحدہ کی ناکامی
شہریوں کا یہ اندرونی اور معاشی غصہ اس وقت اور زیادہ گہرا اور ہولناک ہو جاتا ہے جب وہ عالمی سطح پر شدید انتشار اور عدم تحفظ کا ماحول دیکھتے ہیں۔ دوسری جنگ عظیم کی تباہ کاری کے بعد جس عالمی ڈھانچے کو امن اور تحفظ کے لیے بنایا گیا تھا، وہ آج پوری طرح منہدم ہو چکا ہے۔ جنگ کو روکنے میں بڑے ممالک اور اقوام متحدہ پوری طرح ناکام ہیں۔
یوکرین-روس تنازع، ایران اور امریکہ کی جنگ سے لے کر مشرق وسطیٰ (غزہ اور لبنان) میں جاری انسانی المیہ اس بات کا گواہ ہے کہ اقوام متحدہ
ایک بے بس تماشائی بن کر رہ گیا ہے۔
اقوام متحدہ کے ادارے جنگی جرائم اور انسانی حقوق کی کھلی خلاف ورزیوں پر صرف قراردادیں منظور کرنے اور تشویش ظاہر کرنے تک محدود ہیں۔ عالمی انسانی حقوق کی تنظیموں کے اعداد و شمار ظاہر کرتے ہیں کہ ان جنگوں میں لاکھوں بے گناہ شہری، خواتین اور بچے اپنی جانیں گنوا رہے ہیں اور کروڑوں لوگ بے گھر ہو کر پناہ گزین بننے پر مجبور ہیں۔ جب دنیا کے بڑے اور طاقتور ممالک ہی بین الاقوامی قوانین کی دھجیاں اڑانے لگیں، تو عالمی انصاف کے نظام سے عام عوام کا بھروسہ اٹھنا فطری ہے۔
تعصب کے نئے پہلو
معاشی اور حفاظتی محاذ پر اس ناکامی کے درمیان، سماجی سطح پر بھی تقسیم کی لکیریں گہری ہوتی جا رہی ہیں۔ عالمگیریت نے جغرافیائی فاصلے تو کم کیے ہیں لیکن دلوں کے فاصلے اور بڑھا دیے ہیں۔ آج دنیا کے کئی حصوں میں وطن اور زبان کی بنیاد پر تفریق کے سوالات اٹھائے جا رہے ہیں۔ مغرب کے امیر ممالک میں بڑھتی ہوئی تارکین وطن مخالف لہر اور سیاسی پولرائزیشن اس کی واضح مثال ہے۔
کسی شخص کو صرف اس لیے شک، نفرت یا دوسرے درجے کے سلوک کا سامنا کرنا پڑتا ہے کیونکہ اس کی جائے پیدائش کوئی دوسرا ملک یا خطہ ہے یا وہ کسی دوسرے مذہب سے تعلق رکھتا ہے۔ زبان صرف رابطے کا ذریعہ نہیں ہوتی بلکہ وہ کسی معاشرے کی ثقافت، تاریخ اور وقار کی امین ہوتی ہے۔ جب کسی زبان یا وطن کی بنیاد پر روزگار، انصاف یا سماجی قبولیت میں امتیاز برتا جاتا ہے تو یہ انسانی حقوق کے بنیادی اصولوں پر بالراست حملہ ہوتا ہے۔ یہ تفرقہ انگیز رجحان معاشرے میں ایک نئے قسم کے اندرونی خلفشار اور علیحدگی پسندی کو جنم دے رہا ہے۔
عالمی عدم مساوات
اس عالمی غصے کو سمجھنے کے لیے ہمیں معاشی عدم مساوات کے اعداد و شمار پر غور کرنا ہوگا۔ 'آکسفیم' اور 'ورلڈ ان ایکوالٹی لیب' کی حالیہ رپورٹیں چونکا دینے والے حقائق سامنے لاتی ہیں۔ آج دنیا کی صرف ایک فیصد امیر ترین آبادی کے پاس عالمی دولت کا تقریباً نصف حصہ ہے، جبکہ نچلے درجے کی پچاس فیصد آبادی کے پاس کل دولت کا ایک فیصد سے بھی کم حصہ ہے۔ یہ خلیج کم ہونے کے بجائے مسلسل بڑھ رہی ہے۔ امیر اور امیر ہوتے جا رہے ہیں جبکہ عام شہری قرضوں کے جال میں پھنستا جا رہا ہے۔ جب وسائل مٹھی بھر لوگوں کے کنٹرول میں آ جاتے ہیں تو جمہوری عمل بھی بے معنی ہو جاتا ہے کیونکہ پالیسیاں عوام کی ضروریات کے مطابق نہیں بلکہ ان سرمایہ داروں کے مفادات کو مدنظر رکھ کر بنائی جاتی ہیں۔ جین-زیی کا غصہ اسی ظالمانہ اور غیر انسانی نظام کے خلاف ہے جو اکثریتی آبادی کو حاشیے پر دھکیل کر مٹھی بھر لوگوں کے عیش و عشرت کے مینار کھڑے کرتا ہے۔
معاشی اور سماجی انصاف کے نظام کی فوری ضرورت
جین-زی کا فکری نقطہ نظر اور ان کا عالمی غصہ ہمیں عارضی بحرانوں سے آگے بڑھ کر ایک گہرے خود احتسابی عمل کی طرف لے جاتا ہے۔ یہ واضح ہو چکا ہے کہ موجودہ عالمی بحران کا حل صرف مالیاتی پالیسیوں میں معمولی اصلاحات یا جنگ بندی کے کھوکھلے وعدوں سے ممکن نہیں ہے۔ آج کے دور میں ایک مضبوط معاشی اور سماجی انصاف کے نظام کی شدید ضرورت ہے۔ ہمیں ایسے نئے انتظامات کرنے ہوں گے، جہاں پالیسیاں کارپوریٹ گھرانوں کے منافع اور بڑی طاقتوں کے مفادات سے نہ چلیں بلکہ ’انسان اور اس کے وقار‘ سے رہنمائی حاصل کریں۔
حکومتوں اور عالمی اداروں کو اپنی نیند سے بیدار ہونا ہوگا۔ ہمیں ایک ایسا مساوی، منصفانہ اور ہمہ گیر عالمی معاشرہ بنانا ہوگا جہاں ہر نوجوان کے پاس اس کی قابلیت کے مطابق مناسب روزگار ہو۔ ہر شہری کے لیے سستے مکانات اور معیاری تعلیم ایک تجارتی شے نہ ہو بلکہ بنیادی حق ہو۔
کسی بھی شخص کے ساتھ اس وطن، عقیدے، نسل یا زبان کی بنیاد پر کوئی تفریق نہ برتی جائے۔
بین الاقوامی ادارے طاقتور ممالک کے اثر و رسوخ سے آزاد ہو کر سچے امن اور انسانی حقوق کے تحفظ کے لیے کام کریں۔
انسانی حقوق کا احترام اور عالمی بے چینی کا مستقل خاتمہ اسی وقت ممکن ہے جب ہم انسانی برادری اور سماجی و معاشی انصاف کے اصولوں کو کتابوں سے نکال کر عملی طور پر نافذ کریں۔ وقت تیزی سے نکل رہا ہے، اور اگر اب بھی کوئی ٹھوس قدم نہ اٹھایا گیا تو یہ عالمی غصہ ایک ایسے بڑے انقلاب یا انتشار میں بدل سکتا ہے جسے سنبھالنا کسی کے لیے بھی ممکن نہیں ہوگا۔